logo
Info Sri Lanka | www.infosrilanka.lk

ආණ්ඩුවෙන් එළියට යන්න ශ්‍රීලනිපය ලෑස්ති වෙයි: පඬුවස්නුවරත් බල පෙරලියක්

ශ්‍රී ලංකා නිදහස් පක්ෂය වහාම ආණ්ඩුවෙන් ඉවත්විය යුතු බව එම පක්ෂයේ මධ්‍යම කාරක සභිකයින් බහුතරයක් විසින් යෝජනා කර තිබේ.

පක්ෂ සභාපති මෛත්‍රීපාල සිරිසේන හිටපු ජනාධිපතිවරයාගේ ප්‍රධානත්වයෙන් ඊයේ (08) රාත්‍රියේ පැවැති ශ්‍රීලනිප මාධ්‍ය කාරක සභා රැස්වීමේදී මෙම අදහස ඉදිරිපත්ව තිබේ.

එහිදී දැඩි ආවේගයකින් යුතු අදහස් දක්වා ඇති ඇතැම් මධ්‍යම කාරක සභිකයින් අදම ආණ්ඩුවෙන් ඉල්ලා අස්වීමට තීන්දුවක් ගෙන, හෙට උදැසන රටහමුවේ ප්‍රකාශයට පත්කළ යුතු බව අවධාරණය කර ඇත.

ආණ්ඩුවේ බලධාරීන් ශ්‍රී ලංකා නිදහස් පක්ෂයට කුඩම්මාගේ සැලකිලි දැක්වීම සම්බන්ධයෙන් කරුණු එකින් එක ගෙන අදහස් දක්වා ඇති ඇතැම් මධ්‍යම කාරක සභිකයින්, බැසිලාගමනයත් සමග තත්ත්වය තවදුරටත් බරපතලවීමේ අවදානම පැහැදිලිකර තිබේ.

මෙහිදී අදහස් දක්වා ඇති බොහෝ මධ්‍යම කාරක සභිකයින් පවසා ඇත්තේ, බැසිලාගමනයත් සමග ආණ්ඩුව ජනතාව අතර තව දුරටත් අප්‍රසාදයට ලක්වන බවත් එවැනි තත්වයක් තුළ ආණ්ඩුවේ සිටීම පක්ෂයේ හෝ පාක්ෂිකයින්ගේ කිසිඳු සෙතක් නොවන බවයි.

මෙහිදී ඇතැම් මධ්‍යම කාරක සභිකයින් පවසා ඇත්තේ, ආණ්ඩුවෙන් එලියට යාම අනිවාර්යයෙන් සිදුකල යුතු නමුත් මෙය එයට වේලාව නොවන බවයි. කලබලවී තීන්දු ගැනීම පක්ෂයට හානිකර බව පෙන්වා දී ඇති ඔවුන් මිට ඉහතදී මහින්ද රාජපක්ෂට සහයදීමට ගත් ක්ෂණික තීන්දුව නිසා පක්ෂයට බලවත් හානියක් සිදුවූ බව පැහැදිලිකර තිබේ.

මෙවැනි අවස්ථාවක ආණ්ඩුවෙන් එලියට පැමිණියහොත් පක්ෂ නායකයින් හිරේ විලංගුවේ දැමීමට ආණ්ඩුවේ බලධාරීන් කටයුතු කිරීම අනිවාර්ය බැවින් වේලාව එනතුරු උපක්‍රමිකව කටයුතු කිරීමේ අවශ්‍යතාවය ඇතැම් මධ්‍යම කාරක සභිකයින් පෙන්වා දී ඇත.

එම තත්ත්වය තුල වහාම ජනතාව අතරට යමින් පක්ෂය ශක්තිමත් කිරීමට කටයුතු සිදු කළ යුතු බවටත්, පක්ෂයේ සංවිධාන කටයුතු වේගවත් කළ යුතු බවටත් ශ්‍රී ලංකා නිදහස් පක්ෂ මධ්‍යම කාරක සභාවේදී තීන්දුවක් ගෙන ඇත.

මෙහිදී ආණ්ඩුවේ දේශපාලනයෙන් ඉවත්වීමේ අවශ්‍යතාවය අවදාරණය කරමින් මහචාර්ය සෝමරත්න දිසානායක, මහාචාර්ය රෝහණ ලක්ෂ්මන් පියදාස, කථිකාචාර්ය ධම්ම දිසානායක ඇතුළු පිරිසක් මෙහිදී අදහස් දක්වා ඇත.

මෙහිදී පක්ෂ සභාපති හිටපු ජනාධිපති මෛත්‍රීපාල සිරිසේන පවසා ඇත්තේ, ආණ්ඩුවෙන් ඉවත්වීමට හදිසි තීන්දුවක් නොගෙන පක්ෂය ජනතාව අතරට ගෙනයාමට මුලිකත්වය දෙමින් කටයුතු කිරීම වඩාත් සුදුසු බවයි.

විකල්ප කණ්ඩායමක් හැදීමට අනුමැතිය ඉල්ලයි :

පක්ෂය තුළ විකල්ප කණ්ඩායමක් ලෙස කටයුතු කිරීමට ඇතම් මධ්‍යම කාරක සභිකයින් ඉල්ලීම් කර තිබේ.

ශ්‍රීලනිප මධ්‍යම කාරක සභාවේ බහුතරයක් එසේ ආණ්ඩුවෙන් ඉවත්වීමේ අවශ්‍යතාවය අවදාරණය කරමින් අදහස් ඉදිරිපත් කරද්දී, ආණ්ඩුවේ වරප්‍රසාද ලබන පක්ෂයේ මැති ඇමතිවරුන් මෙන්ම පාර්ලිමේන්තු මන්ත්‍රීවරුන් සමස්ත රැස්වීම පුරාම නිහඬව සිටීම විශේෂ කාරණයක් වී ඇත.

මෙම රැස්වීමේදී අදහස් දක්වා ඇති කොළඹ විශ්ව විද්‍යාලයේ ජ්‍යෙෂ්ඨ කථිකාචාර්ය ධම්ම දිසානායක, දේශපාලන පක්ෂයක් ලෙස ශ්‍රී ලංකා නිදහස් පක්ෂය ප්‍රතිපත්තිමය දේශපාලන තීන්දු තීරණ මත පිහිටා කටයුතු කිරීමේ අවශ්‍යතාවය පෙන්වාදී ඇත.

‘බැසිල් සුළඟ’ එද්දී පඬුවස්නුවර බල පෙරලියක්

මේ අතර පඬුවස්නුවර ප්‍රාදේශීය සභාවේ ශ්‍රී ලංකා පොදුජන පෙරමුණ (පොහොට්ටුව) යෝජනා කල සභාපතිවරයාව වෙනුවට ශ්‍රී ලංකා නිදහස් පක්ෂය විසින් යෝජනා කරන ලද සභාපති වරයෙක් පත් වී තිබේ.

එම සභාව සඳහා සභාපතිවරයකු තෝරා පත්කර ගැනීම සඳහා අද (08) පැවති රහස් ඡන්ද විමසීමේ දී ශ්‍රී ලංකා පොදුජන පෙරමුණ විසින් නම් කරන ලද අරවින්ද නමැති ප්‍රාදේශීය සභා මන්ත්‍රීවරයා ඡන්ද 16 ලබාගනිද්දී, ශ්‍රී ලංකා නිදහස් පක්ෂය වෙනුවෙන් රාජ්‍ය අමාත්‍ය දයාසිරි ජයසේකර නිර්දේශ කර තිබු බමුණුසිංහ මන්ත්‍රීවරයා ඡන්ද 20 ක් ලබාගෙන තිබේ.

ශ්‍රී ලංකා පොදුජන පෙරමුණ මන්ත්‍රීවරුන් 18ක්, එක්සත් ජාතික පක්ෂයේ මන්ත්‍රීවරුන් 11ක්, ශ්‍රී ලංකා නිදහස් පක්ෂයේ මන්ත්‍රීවරුන් 07 සහ ජනතා විමුක්ති පෙරමුණේ මන්ත්‍රීවරයෙක් (01) පඬුවස්නුවර ප්‍රාදේශීය සභාවේ නියෝජිතයින් ලෙස කටයුතු කරයි.

පඬුවස්නුවර ආසනය ශ්‍රී ලංකා නිදහස් පක්ෂ මහලේකම් දයාසිරි ජයසේකරගේ ඡන්ද බල ප්‍රදේශය වන අතර එම මැතිවරණ කොට්ඨාශයේ ශ්‍රී ලංකා පොදුජන පෙරමුණ සංවිධායකවරයා වන්නේ ගුණපාල රත්නසේකර පාර්ලිමේන්තු මන්ත්‍රීවරයාය.

පඬුවස්නුවර ප්‍රාදේශීය සභාවේ සභාපති ලෙස අරවින්ද නමැති ප්‍රාදේශීය සභා මන්ත්‍රීවරයාගේ නම නිර්දේශකර ඇත්තේ, අමාත්‍ය ජොන්ස්ටන් ප්‍රනාන්දු හා රත්නසිංහ පාර්ලිමේන්තු මන්ත්‍රීවරයා විසිනි.

Related news

ප්‍රශ්න උග්‍ර වෙයි: ශ්‍රීලනිප කොටසක් දැඩි තීන්දුවක

administrator

පොලිසියේදී වධ දී මරා දැමූ ‍චදික් වික්‍රමාරච්චි වෙනුවෙන් මිලියනයක වන්දියක් ශ්‍රේෂ්ඨාධිකරණය නියම කරයි

administrator

විරෝධතා පලදරයි: කොතලාවල විශ්ව විද්‍යාලය, විශ්ව විද්‍යාල ප්‍රතිපාදන කොමිසම යටතට

administrator

මුදල් අමාත්‍යංශයේ රවීගේ වාර්තාවක් බැසිල් කඩලා

administrator

රිෂාඩ්ගේ ගෙදර මෙහෙකාර සේවයට යෙදවූ, පිලිස්සී මියගිය දැරිවියට ලිංගික අතවර වෙලා

administrator

වියත් ලේබල් ගොඩහේවාගෙන් අමාත්‍යංශ කෑල්ලක් ගලවයි: පවුලේ ශෂීන්ද්‍රට තවත් කෑල්ලක්

administrator