මැදපෙරදිග පවතින යුදමය තත්ත්වය හේතුවෙන් මෙරට තුළ මතුව ඇති බලශක්ති අර්බුදය අතරතුරද, එළැඹෙන මාසවල පැවැත්වෙන ආගමික උත්සව සඳහා කිසිදු විදුලි සීමා කිරීමක් සිදු නොකරන බව අමාත්ය වෛද්ය නලින්ද ජයතිස්ස මහතා ප්රකාශ කරයි.
කැබිනට් තීරණ දැනුම්දීමේ මාධ්ය හමුවේදී මාධ්යවේදියෙකු විසින් නැගූ ප්රශ්නයකට පිළිතුරු ලබා දෙමින් අමාත්යවරයා මේ බව සඳහන් කළේය.
ඔහු පැවසුවේ, බලශක්ති කළමනාකරණය සඳහා රජය මේ වන විට විවිධ ක්රියාමාර්ග රැසක් ක්රියාත්මක කරමින් සිටින බවයි. එහි කොටසක් ලෙස බදාදා දින රජයේ නිවාඩු දිනයක් ලෙස ප්රකාශයට පත් කර ඇති බවද සඳහන් විය.
තවද, අත්යවශ්ය සේවා කොමසාරිස්වරයා විසින් රජයේ ආයතන සඳහා බලශක්ති අරපිරිමැස්ම පිළිබඳ විශේෂ මාර්ගෝපදේශ සංග්රහයක් නිකුත් කර ඇති පසුබිමක, මැයි සහ ජූනි මාසවල පැවැත්වෙන ආගමික උත්සව සඳහා වැයවන විදුලිය පිළිබඳව අදහස් දක්වමින් අමාත්යවරයා මෙම ප්රකාශය සිදු කළේය.
අමාත්යවරයා අවධාරණය කළේ, ජනතාවගේ ජීවිතය ආර්ථික කටයුතු වලට පමණක් සීමා නොවී, සංස්කෘතික, සමාජීය හා ආත්මීය අගයන් සමඟ බැඳී පවතින බවයි.
එම හේතුවෙන් වෙසක්, පොසොන්, ඇසළ ඇතුළු ආගමික උත්සව සීමා කිරීමට රජයට කිසිදු බලාපොරොත්තුවක් නොමැති බවද ඔහු පැවසීය.
එමෙන්ම, එම උත්සව සඳහා අවශ්ය රාජ්ය අනුග්රහය ලබාදීමට රජය කටයුතු කරන අතර, ලෝකයේ පවතින තත්ත්වය සැලකිල්ලට ගනිමින් ජනතාව බලශක්ති පරිභෝජනය පිළිබඳ දැනුවත්ව සහ වගකීමෙන් යුතු ලෙස කටයුතු කරනු ඇතැයි අපේක්ෂා කරන බවද අමාත්යවරයා වැඩිදුරටත් සඳහන් කළේය.