සමස්ත ලෝකයේම අවධානය දිනාගත් ‘ආටිමිස් 3’ (Artemis III) චන්ද්ර මෙහෙයුම යටතේ සඳ බලා යාමට සුදුසුකම් ලැබූ සුවිශේෂී ගගනගාමීන් සිවුදෙනා (04) සහ අතිරේක ගගනගාමියා කවුරුන්ද යන්න නිල වශයෙන් හඳුන්වා දීම ඊයේ (9) ඇමරිකාවේ නාසා (NASA) ආයතනය විසින් සිදුකරනු ලැබීය.
මෙම නිවේදනයත් සමඟින් නාසා ආයතනය සිය මීළඟ දැවැන්ත අභ්යවකාශ ජයග්රහණය වෙනුවෙන් තැබූ තීරණාත්මක පියවරක් සනිටුහන් කර ඇත.
නාසා ආයතනය ප්රකාශ කළ පරිදි, මෙම සුවිශේෂී මෙහෙයුමේ සමස්ත අණදෙන නිලධාරියා (Commander) ලෙස කටයුතු කිරීමේ භාග්යය හිමිකරගෙන ඇත්තේ නාසා හි අත්දැකීම් බහුල ගගනගාමියෙකු වන රැන්ඩි බ්රෙස්නික් (Randy Bresnik) මහතාය.
එමෙන්ම, යානයේ ප්රධාන නියමුවා (Pilot) ලෙස යුරෝපීය අභ්යවකාශ ඒජන්සිය (ESA) නියෝජනය කරමින් ලූකා පර්මිතානෝ (Luca Parmitano) මහතා කටයුතු කිරීමට නියමිතව ඇත.
මීට අමතරව, මෙම චන්ද්ර සංචාරය සඳහා මෙහෙයුම් විශේෂඥයන් (Mission Specialists) ලෙස නාසා ආයතනයේ ෆ්රෑන්ක් රුබියෝ (Frank Rubio) සහ ඇන්ඩ්රේ ඩග්ලස් (Andre Douglas) යන මහත්වරුන් එක්වන අතර, කිසියම් හදිසි අවස්ථාවකදී භාවිත කිරීම සඳහා අතිරේක (Backup) ගගනගාමියෙකු ලෙස බොබ් හයින්ස් (Bob Hines) මහතාව ද නම් කර තිබේ.
විද්යාඥයන් පවසන පරිදි මෙම බලාපොරොත්තු සහගත ‘ආටිමිස් 3’ චන්ද්ර මෙහෙයුම ක්රියාත්මක කිරීමට සැලසුම් කර ඇත්තේ 2027 වසරේ අවසාන භාගයේදීය.
මෙවර මෙහෙයුමේදී ද ගගනගාමීන් සෘජුවම සඳ මතට පය තැබීමක් හෝ ගොඩබෑමක් (Moon Landing) සිදු නොකරන නමුත්, පෘථිවියේ සහ චන්ද්රයාගේ කක්ෂයන් (Orbits) තුළ රැඳී සිටිමින් අනාගත අභ්යවකාශ ගමන් සඳහා අත්යවශ්ය වන තාක්ෂණික මෙහෙයුම් රැසක් සජීවීව පරීක්ෂාවට ලක් කිරීමට නියමිතව ඇත.
එහිදී ප්රධාන වශයෙන්ම අභ්යවකාශ යානා එකිනෙකට සම්බන්ධ කිරීමේ සංකීර්ණ ක්රියාවලීන් (Docking procedures) මෙන්ම, ඉදිරියේදී සඳට ගගනගාමීන් ගොඩබැමේදී සැබවින්ම ක්රියාත්මක කිරීමට නියමිත මානව ගොඩබැමීමේ පද්ධති (Human Landing Systems) විධිමත්ව හා ප්රායෝගිකව පරීක්ෂා කිරීම මෙම මෙහෙයුමේ මූලිකම සහ ප්රධානතම අරමුණ වෙයි.
ලෝක ඉතිහාසයේ ප්රථම වතාවට සඳ මතට පිරිමියකු සහ ගැහැනියක සැබවින්ම ගොඩබෑම සිදුකිරීමට නාසා ආයතනය සැලසුම් කර ඇත්තේ මීළඟට ක්රියාත්මක වන ‘ආටිමිස් 4’ (Artemis IV) චන්ද්ර මෙහෙයුමේදීය.
ඉන් අනතුරුව, මානව ඉතිහාසයේ සුවිශේෂී සන්ධිස්ථානයක් සනිටුහන් කරමින් සඳ මතුපිට ස්ථිර මිනිස් නවාතැන්පොළක් (Lunar Base) ඉදිකිරීමට ද නාසා ආයතනය දැනටමත් මූලික සැලසුම් සකස් කර අවසන්ය.
කෙසේ වුවද, එම සියලුම ඉදිරි දැවැන්ත අභ්යවකාශ ව්යාපෘතීන්හි සාර්ථකත්වය මුළුමනින්ම තීරණය වන්නේ, 2027 වසරේදී ගගනගාමීන් සිවුදෙනා සමඟින් දියත් වීමට නියමිත මෙම ‘ආටිමිස් 3’ මෙහෙයුම ලබන සාර්ථකත්වය සහ එහි ප්රතිඵල මත පදනම්ව බව නාසා ආයතනය වැඩිදුරටත් අවධාරණය කරයි.
