ඉරානය විසින් වෙඩි තබා බිම හෙළන ලද ඇමෙරිකානු ප්රහාරක යානයේ නියමුවා, දරුණු වෙඩි හුවමාරුවකින් පසු සාර්ථකව මුදාගත් බව ඇමෙරිකානු ජනාධිපති ඩොනල්ඩ් ට්රම්ප් නිල වශයෙන් ප්රකාශ කර තිබේ.
පසුගිය සිකුරාදා ඉරාන ගුවන් සීමාවේදී F-15E Strike Eagle වර්ගයේ ප්රහාරක යානයක් කඩා වැටීමෙන් පසු අතුරුදන්ව සිටි මෙම නියමුවා සෙවීම සඳහා ඇමෙරිකානු හමුදාව අතිශය භයානක මෙහෙයුමක් දියත් කර තිබුණි.
ජනාධිපති ට්රම්ප් සිය සමාජ මාධ්ය ගිණුම හරහා සඳහන් කළේ, ඉරානයේ දුෂ්කර කඳුකර ප්රදේශයක සිටි මෙම නියමුවා මුදාගැනීමේදී දෙපාර්ශවය අතර දරුණු වෙඩි හුවමාරුවක් පවා සිදුවූ බවයි.
යානය කඩා වැටීමත් සමඟ ක්රියාත්මක වූ ඉරාන බලධාරීන්, “සතුරු ගුවන් නියමුවා” අල්ලා භාර දෙන ඕනෑම අයෙකුට විශාල ත්යාග පිරිනමන බවට නිවේදනය කර තිබුණි.
කෙසේ වෙතත්, ඇමෙරිකානු බුද්ධි අංශ සහ ගුවන් යානා කිහිපයක සහය ඇතිව දවසේ පැය 24 පුරාම ඔහුගේ පිහිටීම නිරීක්ෂණය කරමින් සිටි මෙහෙයුම් කණ්ඩායම්, ඉරාන හමුදාවන්ට පෙර නියමුවා වෙත ළඟා වීමට සමත් විය.
පෙබරවාරි අග භාගයේ ආරම්භ වූ මෙම යුදමය වාතාවරණය තුළ ඉරාන භූමියට කඩා වැටුණු පළමු ඇමෙරිකානු යානය මෙය වේ. ඉරානය පවසන්නේ තමන් දැනටමත් ඇමෙරිකානු යානා තුනක් බිම හෙළා ඇති බව වුවත්, ඇමෙරිකාව තවමත් තහවුරු කර ඇත්තේ මෙම එක් යානයක් පිළිබඳව පමණි.
මුදාගත් නියමුවා මේ වන විට තුවාල ලබා ප්රතිකාර ලබමින් සිටින අතර, ඔහුගේ තත්ත්වය බරපතල නොවන බව ජනාධිපතිවරයා වැඩිදුරටත් සහතික කර ඇත.
