පලස්තීනුවන් සිය නිවාසවලින් නෙරපා හැරීම සිහිපත් කරන 78 වන ‘නක්බා දින’ (Nakba Day) සැමරුම යෙදී තිබූ ඊයේ (15) දිනයේදී, Israel හමුදාව විසින් Gaza City වෙත එල්ල කළ ගුවන් ප්රහාර දෙකකින් කාන්තාවන් තිදෙනෙකු සහ එක් දරුවෙකු ඇතුළු අවම වශයෙන් පලස්තීනුවන් හත් දෙනෙකු ජීවිතක්ෂයට පත්ව තිබේ.
ගාසා නගරයේ නේවාසික ගොඩනැගිල්ලක් සහ සිවිල් වාහනයක් ඉලක්ක කර ගනිමින් එල්ල කළ මෙම ප්රහාරවලින් තවත් පුද්ගලයින් 45කට අධික පිරිසක් තුවාල ලබා ඇති අතර, ඉන් කිහිපදෙනෙකුගේ තත්ත්වය බරපතළ බව වෛද්ය ආරංචි මාර්ග සඳහන් කරයි.
Benjamin Netanyahu සහ Israel Katz ඒකාබද්ධ ප්රකාශයක් නිකුත් කරමින් පවසා ඇත්තේ, 2023 ඔක්තෝබර් 7 ප්රහාරයේ ප්රධාන සැලසුම්කරුවෙකු ලෙස සැලකෙන හමාස් සංවිධානයේ ගාසා ප්රධානී Izz al-Din al-Haddad ඉලක්ක කර ගනිමින් මෙම ප්රහාරය දියත් කළ බවයි.
ගාසා සිවිල් ආරක්ෂක ප්රකාශක Mahmoud Basel පවසා ඇත්තේ, කිසිදු පූර්ව අනතුරු ඇඟවීමකින් තොරව මෙම මිසයිල ප්රහාරය එල්ල වූ බවත්, ප්රදේශයේ පවුල් පිටින් ජීවත් වූ විශාල පිරිසක් මියගොස් සහ තුවාල ලබා ඇති බවත්ය.
නැගෙනහිර ගාසා තීරයේ සිට අවතැන් වූ විශාල පිරිසක් රැකවරණය සඳහා මෙම බටහිර ගාසා ප්රදේශයට පැමිණ සිටීම හේතුවෙන් ප්රහාරයට ලක් වූ කලාපය අධික ජනගහනයකින් යුක්ත වූ බව විදෙස් මාධ්ය වාර්තා කරයි.
Donald Trumpගේ මැදිහත්වීමෙන් පසුගිය ඔක්තෝබර් මාසයේදී ගාසා තීරය සඳහා සටන් විරාමයක් ප්රකාශයට පත් කළද, බිම් මට්ටමේ ගැටුම් සහ ගුවන් ප්රහාර තවදුරටත් සිදුවෙමින් පවතී.
ගාසා සෞඛ්ය අමාත්යාංශ දත්ත අනුව, එම සටන් විරාමය ප්රකාශයට පත් කිරීමෙන් පසුවද ඊශ්රායල ප්රහාර හේතුවෙන් පලස්තීනුවන් 850කට ආසන්න පිරිසක් ජීවිතක්ෂයට පත්ව තිබේ.
“මෙම සටන් විරාමය සහනයක් ගෙනෙනු ඇතැයි අපේක්ෂා කළද, එය තවදුරටත් මරණය සහ ඛේදවාචකය පමණක් උදාකර තිබෙනවා” යැයි ප්රදේශවාසීන් චෝදනා කරයි.
