ලක්විජය බලාගාරය සඳහා ප්රමිතියෙන් බාල, ‘සම්පූර්ණයෙන්ම ප්රතික්ෂේප කළ යුතු’ මට්ටමේ ගල් අඟුරු රැගත් ‘MV JOSCO YONGZHOU’ නමැති නෞකාව මේ වන විට ශ්රී ලංකා මුහුදු සීමාවට පැමිණ ඇතැයි ‘ෆ්රී ලෝයර්ස්’ (Free Lawyers) සංවිධානය පවසයි. විධිමත් විමර්ශනයකින් තොරව මෙම තොගය ගොඩබෑමට හෝ ඒ සඳහා මුදල් ගෙවීමට කටයුතු නොකරන ලෙස එම සංවිධානය රජයට සහ අදාළ බලධාරීන්ට දැඩිව අනතුරු අඟවයි.
අදාළ සංවිධානය පෙන්වා දෙන්නේ, දකුණු අප්රිකාවේ රිචඩ්ස් බේ වරායෙන් පටවා ඇති මෙම ගල් අඟුරු තොගයේ අළු ප්රතිශතය (Ash Content) 16.8% ක් ලෙස වාර්තා වන බවයි. ලංකා ගල්අඟුරු සමාගමේ ටෙන්ඩර් කොන්දේසිවලට අනුව, අළු ප්රතිශතය 16% ට වඩා වැඩි ගල් අඟුරු තොග අනිවාර්යයෙන්ම ප්රතික්ෂේප කළ යුතුය. නීතිඥ අතුල ද සිල්වා සහ නීතිඥ පියල් දර්ශන ගුරුගේ මහත්වරුන් පවසන්නේ, දඩ මුදල් ගෙවීමකින් පසුව හෝ මෙම නැව ගොඩබෑමේ නෛතික හැකියාවක් නොමැති බවයි.
මෙම තොගය සපයන ‘Taranjot Resource (Pvt) Ltd’ සමාගම, ලියාපදිංචියට පෙර සිටම අපේක්ෂිත ප්රමිතියට ගල් අඟුරු සැපයීමට අපොහොසත් වී තිබූ බව ජාතික විගණන කාර්යාල වාර්තා මගින් ද තහවුරු වී ඇත. කෙසේ වෙතත්, එවැනි පසුබිමක් තුළ ද පසුගිය මාර්තු මාසයේදී රජය එම සමාගම සමඟ ගිවිසුම්ගත වී තිබීම බරපතල කරුණක් බව ෆ්රී ලෝයර්ස් සංවිධානය පෙන්වා දෙයි.
ප්රමිතියෙන් බාල ගල් අඟුරු මිලදී ගැනීම් හේතුවෙන් මෙරටට රුපියල් බිලියන 20 කට වැඩි පාඩුවක් සිදුවී ඇති බවට වාර්තා වේ. පසුගියදා පාර්ලිමේන්තුවේදී අදහස් දක්වමින් වරාය හා සිවිල් ගුවන් සේවා අමාත්ය අනුර කරුණාතිලක මහතා ප්රකාශ කළේ, බාල ගල් අඟුරු සැපයූ සමාගම්වලට ගෙවීම් නොකර රුපියල් කෝටි 960 ක මුදලක් දැනටමත් රඳවාගෙන ඇති බවයි.
නොරොච්චෝලට ආසන්න මුහුදු සීමාවේ නැංගුරම් ලා ඇති මෙම නැව පිළිබඳව ස්ථානීය පරීක්ෂාවක් සිදු කරන ලෙසත්, ගල් අඟුරු කොමිෂන් සභාව වහාම මැදිහත් වන ලෙසත් එම සංවිධානය ඉල්ලා සිටී. රජයේ මුදල් රෙගුලාසි අනුව, ප්රමිතියෙන් තොර මෙම තොගය ගොඩබෑම නීති විරෝධී ක්රියාවක් බවත්, ඊට ගෙවීම් සිදු කිරීමෙන් වළකින ලෙසත් ඔවුන් අවධාරණය කරයි.
