ශ්රී ලංකාවේ සිය රාජ්ය තාන්ත්රික සේවා කාලය සාර්ථකව නිම කර මෙරටින් නික්ම යාමට නියමිත, ශ්රී ලංකාවේ ඉන්දීය නියෝජ්ය මහකොමසාරිස් ආචාර්ය සත්යන්ජල් පාණ්ඩේ (Dr. Satyanjal Pandey) මහතා අද (09) ආරක්ෂක අමාත්යාංශයේදී විශේෂ නිල හමුවකට එක්විය.
එහිදී ඒ මහතා ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්රාමික) මහතා හමු වී සමුගැනීමේ සාකච්ඡාවක නිරත විය.
මෙම සමුගැනීමේ නිල හමුව අතිශය සුහදශීලී මට්ටමින් පැවැත්වුණු අතර, ශ්රී ලංකාව සහ ඉන්දියාව අතර දශක ගණනාවක සිට පවතින දිගුකාලීන, ඓතිහාසික හා මිත්රශීලී සබඳතා පිළිබඳව ආරක්ෂක ලේකම්වරයා සහ ආචාර්ය පාණ්ඩේ මහතා මෙහිදී අන්යෝන්ය වශයෙන් අදහස් හුවමාරු කර ගත්හ. දෙරටේ ආරක්ෂක කලාපීය සහයෝගීතාවය මෙන්ම ඉදිරි ආරක්ෂක වැඩපිළිවෙලවල් පිළිබඳව ද මෙහිදී කෙටි අවධානයක් යොමු කෙරිණි.
ආචාර්ය සත්යන්ජල් පාණ්ඩේ මහතා මෙරට ඉන්දීය නියෝජ්ය මහකොමසාරිස්වරයා ලෙස කටයුතු කළ සිය නිල ධූර කාලය තුළ, ශ්රී ලංකාව සහ ඉන්දියාව අතර ද්විපාර්ශ්වික (Bilateral relations) සහ රාජ්ය තාන්ත්රික සබඳතා තවදුරටත් උපරිම අයුරින් ශක්තිමත් කිරීම වෙනුවෙන් දැක්වූ සුවිශේෂී දායකත්වය සහ කැපවීම ආරක්ෂක ලේකම්වරයාගේ ඉහළ ඇගයීමට ලක් විය.
සාකච්ඡාව අවසානයේ ආරක්ෂක ලේකම් සම්පත් තුයියකොන්තා මහතා විසින් මෙරටින් නික්ම යන නියෝජ්ය මහකොමසාරිස්වරයාගේ ඉදිරි රාජ්ය තාන්ත්රික ජීවිතය සහ අනාගත කටයුතු සර්වප්රකාරයෙන්ම සාර්ථක කර ගැනීම සඳහා සිය උණුසුම් සුබ පැතුම් ද පිරිනමන ලදී.
