රට තුළ විදුලිය, ගෑස් සහ ඉන්ධන සඳහා අයකරනු ලබන ගාස්තු අසාධාරණ ලෙස ඉහළ දැමීම හේතුවෙන් මෙරට ව්යාපාරිකයන් තමන් සතු කර්මාන්ත සම්පූර්ණයෙන්ම අත්හැර දමා විදේශගත වීමේ සූදානමක පසුවන බව දේශීය ව්යවසායකයන් බලගැන්වීමේ සංවිධානය බරපතළ අනතුරු ඇඟවීමක් සිදුකරයි.
දැනට පවත්නා ඉන්ධන අර්බුදය මධ්යයේ වුවද, කුඩා පරිමාණයේ දේශීය නිෂ්පාදකයන් සිය නිපැයුම් වෙළෙඳපොළ වෙත ප්රවාහනය කරනු ලබන්නේ තමන් සතු කුඩා වාහන භාවිතයෙන් බැවින්, මෙම මිල ඉහළ දැමීම් සමස්ත සුළු හා මධ්ය පරිමාණ ක්ෂේත්රයටම සෘජුවම මාරක ප්රහාරයක් එල්ල කර ඇති බව එම සංවිධානයේ ලේකම් පුෂ්ප කුමාර කරුණාරත්න මහතා පවසයි.
“පාරිභෝගිකයා පිට බර පටවන්න බෑ – රජය මැදිහත් වෙන්න”
මේ හේතුවෙන් මතුවන අධික අතිරේක නිෂ්පාදන පිරිවැයෙහි බර සාමාන්ය පාරිභෝගික ජනතාව මත පැටවීම වැළැක්වීමට නම් වත්මන් රජය වහාම මේ සඳහා මැදිහත් විය යුතු බව ලේකම්වරයා අවධාරණය කරයි.
වත්මන් පාලනය බලයට පත් වූයේ රටේ පවතින සාම්ප්රදායික ක්රමය වෙනස් කරන බවට ජනතාවට දැඩි ලෙස පොරොන්දු වෙමින් බව ද හෙතෙම මෙහිදී මතක් කර සිටියි.
දේශයේ ආර්ථිකය සැබෑ ලෙසම ශක්තිමත් කරමින් රට ඉදිරියට ගෙනයා හැක්කේ දේශීය ව්යවසායකයන් ආරක්ෂා කිරීමෙන් පමණක් බව පෙන්වා දෙන ඔහු, ඔවුන් ගමන් කරන සංවර්ධන මාවත මෙලෙස බදු සහ ගාස්තු හරහා අහුරා නොදමන ලෙස රජයෙන් ඉල්ලා සිටියි.
වත්මන් ආර්ථික වටපිටාව තුළ ලංකාව ඇතුළත ව්යාපාරයක් පවත්වාගෙන යමින් සුළු හෝ ලාභයක් ඉපැයීම අතිශය දුෂ්කර සහ බියකරු කටයුත්තක් වී ඇති බවට කරුණාරත්න මහතා චෝදනා කරයි.
“බලයට පත්වීමට පෙර ඉන්ධන මිල ඉහළ යාම සම්බන්ධයෙන් එදා විපක්ෂය විදිහට දක්වපු ප්රබල අදහස් සහ විවේචන අද වන විට පාලකයන්ට සම්පූර්ණයෙන්ම අමතක වෙලා තිබෙනවා.”
එබැවින් රජය වහාම ක්රියාත්මක වී දැනට පනවා ඇති අධික බදු ලිහිල් කළ යුතු බවත්, ඉන්ධන සහ අනෙකුත් ගාස්තු පහත හෙළමින් සාමාන්ය ජනතාවට මෙන්ම දේශීය ව්යාපාරික ප්රජාවට කඩිනම් සහනයක් ලබා දිය යුතු බවත් ලේකම්වරයා පවසයි.
යම් හෙයකින් රජය මෙම සහන ලබාදීමට අපොහොසත් වුවහොත්, මෙරට සුළු හා මධ්ය පරිමාණ ව්යවසායකයන් (SMEs) සිය ව්යාපාර වසා දමා මෙරටින් පිටව යනු ඇත.
ඉන්පසු ඔවුන් ඉහළ ආදායම් උපයමින් තමන් සතු වෘත්තීය දැනුම, ශ්රමය සහ ඥානය වෙනත් විදේශීය රටවල ප්රගතිය උදෙසා යෙදවීම කිසිසේත්ම වැළැක්විය නොහැකි වනු ඇති බව ද ඔහු වැඩිදුරටත් අවධාරණය කර සිටියි.
